Takimi i shtatë Vjetor i partnerëve të Rrjetit të Qeverisjes Territoriale në Ballkanin Perëndimor (TG-WeB)
Më 7 qershor 2024, partnerët e TG WeB nga Universiteti i Sofjes “Shën Kliment Ohridski” në Bullgari, pritën takimin e 7-të vjetor të TG-WeB, Rrjeti për Qeverisjen Territoriale i Ballkanit Perëndimor. Ky takim vjetor (i mbajtur në një mënyrë hibride) mblodhi së bashku partnerët nga Shqipëria, Serbia, Maqedonia e Veriut, Mali i Zi, Greqia dhe Bullgaria, për të diskutuar çështjet urgjente të tranzicionit të gjelbër dhe zhvillimit të qëndrueshëm në Ballkanin Perëndimor.
Takimi i këtij viti kishte për qëllim adresimin e nevojës kritike për integrimin e Objektivave të Zhvillimit të Qëndrueshëm (SDG), një gur themeli për modelet e qeverisjes së Bashkimit Evropian dhe një pikë referimi për matjen e performancës së vendit në politikat kombëtare dhe nënkombëtare. Takimi theksoi domosdoshmërinë e diskutimit të tranzicionit të gjelbër nga perspektiva e SDG-ve, veçanërisht duke pasur parasysh transformimet e vazhdueshme të rajonit dhe kompleksitetin e përfshirë në kalimin në një të ardhme më të gjelbër. Diskutimi dhe prezantimet e zhvilluara synonin të jepnin njohuri më të thella mbi ndryshimet e kërkuara në modelet e zhvillimit dhe veprimet specifike të nevojshme për të arritur qëndrueshmërinë e ardhshme të rajonit, duke pasur parasysh faktin se vendet e Ballkanit Perëndimor në përgjithësi kanë vështirësi në arritjen e shumë prej këtyre synimeve, duke nënvizuar urgjencën e adoptimit të qasjeve të qëndrueshme.
Sesioni i mëngjesit përmbante një sërë prezantimesh dhe diskutimesh në grup. Këto prezantime mbuluan një sërë çështjesh me interes pë temën e këtij viti, nga diskutimi i progresit drejt SDG-ve (duke theksuar arritjet dhe sfidat e vazhdueshme) deri te prezantimet e fokusuara në perspektivat e aktorëve të ndryshëm në zbatimin e SDG-ve. Në raundin e dytë të prezantimit, u diskutuan çështjet e qëndrueshmërisë territoriale në BP, duke sjellë në diskutim përdorimin e skenarëve si mjete për zhvillim të qëndrueshëm, duke treguar se si përpjekjet bashkëpunuese në planifikimin hapësinor mund të kalojnë hendekun midis niveleve lokale dhe kombëtare. Sesioni i mëngjesit përfundoi me një studim specifik të rastit te Kolasinit në të cilin partnerët e Malit të Zi prezantuan hulumtimin mbi ekzaminimin e ndikimit të politikave publike dhe interesave private në zhvillimin lokal.
Pas një pushimi dreke, seminari rifilloi me diskutime të vazhdueshme në grup. Pjesëmarrësit u angazhuan në një dialog të hapur rreth nismave, veprimeve dhe politikave që duhet dhe po ndërmerren në rajon. Diskutimet eksploruan gjithashtu të ardhmen dhe sfidat e rrjetit TG-WeB, idetë për financimin e aktiviteteve dhe adresimin e çështjeve organizative, të tilla si përfshirja e anëtarëve të rinj dhe planifikimi për seminarin TG-WeB 2025. Diskutimi për vazhdimin e Revistës Vjetore të TG WeB dhe zgjerimi i anëtarëve të bordit redaktues do të diskutohet edhe më tej mes të gjithë anëtarëve të rrjetit.
Si përfundim, disa mesazhe kryesore u ritheksuan gjatë të gjitha diskutimeve. Në këtë drejtim, ndërsa Ballkani Perëndimor vazhdon të përballet me sfida të rëndësishme të qëndrueshmërisë, rrjetet si TG-WeB janë jetike. Për këtë arsye, rrjeti duhet të përforcojë statusin e tij si një platformë për bashkëpunim, ndarjen e praktikave më të mira dhe avancimin drejt një të ardhmeje më të gjelbër dhe më të qëndrueshme.
