Ndotja në Tiranë – Prezantohet raporti alternativ i cilësisë së ajrit dhe nivelit të zhurmave

Në kuadër të projektit “Mbështetja e Organizatave Mjedisore të Shoqërisë Civile” (GreenAL), që zbatohet nga Co-PLAN, u zhvillua aktiviteti “GreenAL: Publikimi i Gjetjeve Mjedisore, Grantdhënia dhe Rrjetëzimi.” Përgjatë aktivitetit, u publikuan gjetjet e raportit vjetor alternativ mbi cilësinë e ajrit dhe nivelin e zhurmave në qytetin e Tiranës për vitin 2024, si dhe u bë prezantimi i projekteve fituese në kuadër të thirrjes së parë për Grante Tematike dhe Rajonale. Në përfundim të eventit, u zyrtarizua rrjeti i organizatave të shoqërisë civile të GreenAL.

Ndotja në Tiranë sipas raportit alternativ të cilësisë së ajrit

Përgjatë vitit të shkuar, u monitorua ndotja në Tiranë në 13 stacione të shpërndara në unazën e vogël të Tiranës (Qendër, Treni, Piramida, Pazari i Ri, Rruga e Kavajës, Kryqëzimi i 21-shit, Zogu i Zi, Bulevardi, Medreseja, rruga “Bardhyl”, Shkolla “Mihal Grameno”, sheshi “Italia”, stadiumi “Dinamo”). Rezultatet për periudhën e monitorimit (gusht-dhjetor)  tregojnë se disa stacione monitorimi kanë raportuar nivele të dioksidit të karbonit (CO₂), nivele të grimcave të imëta, dioksidit të azotit, si dhe nivele të zhurmës mbi kufijtë e pranueshëm. Për të lexuar raportin e plotë, klikoni këtu.

Fituesit e Granteve Tematike dhe Rajonale

Pjesë e eventit ishte gjithashtu dhe ceremonia e nënshkrimit të kontratave me fituesit e Granteve Tematike dhe Rajonale. Grantet ofrojnë ndihmë financiare për Organizatat e Shoqërisë Civile në Shqipëri që janë të fokusuara dhe të pajisura me ekspertizë në një nga temat e lidhura me klimën, natyrën dhe ndotjen. Fituesit e granteve janë si më poshtë:

  • Qendra për Transparencë dhe Informim të Lirë
  • Qendra shqiptare për zhvillim dhe integrim
  • Qendra “Fol”
  • Qendra Burimore e Mjedisit në Shqipëri (REC)
  • Shoqata “Qendra Sociale në Ndihmë të Njerëzve në Nevojë” (QSNNN)
  • Shoqata “AGROPUKA” AP
  • Qendra “Lëvizja Rinore për Democraci” Pukë
  • Klubi Ekologjik, Lezhë
  • Vizion Ekologjik per Rajonin e Shkodres
  • Opportunity Balance and Overcoming
  • Social Inclusion For Development
  • Shoqata Ekspertët e Rinj Mjedisor (SHERM Albania)
  • Agro-Eko Dibra
  • Qendra “Changing the Future”
  • Fondacioni Milieukontakt Shqipëri
  • Trees for Lurë
  • Agjencia Kombetare e Pyjeve
  • Qendra Epoka e Re
  • Vento di Terra, Shqipëri
  • New Impact
  • H2H Foundation
  • North Green Association
  • Art Kontakt

Memorandumi i Bashkëpunimit për Rrjetin e OSHC-ve GreenAL

Në fund të aktivitetit, u realizua dhe nënshkrimi i Memorandumit të Bashkëpunimit për krijimin e Rrjetit të Organizatave të Shoqërisë Civile GreenAL, që synon të forcojë bashkëpunimin ndërmjet OSHC-ve mjedisore, OSHC-ve të tjera jo-mjedisore, ekspertëve, aktivistëve dhe palëve të tjera të interesuara, për të mbështetur përpjekjet kolektive për të ndërgjegjësuar dhe zhvilluar iniciativa të përbashkëta mbi sfidat mjedisore.

Në event, përcollën fjalën e tyre përshëndetëse Drejtoresha Ekzekutive e Co-PLAN, Anila Bejko (Gjika), si dhe Zëvendës Shefi i Misionit dhe Shef i Bashkëpunimit për Zhvillim të Ambasadës Suedeze në Shqipëri, Erik Illes.

Aktiviteti u realizua në kuadër të projektit GreenAL “Mbështetja e Organizatave të Shoqërisë Civile 2024 -2027”, financuar nga Agjencia Ndërkombëtare Suedeze për Bashkëpunim dhe Zhvillim (Sida) me fondet e Qeverisë Suedeze dhe zbatohet nga Co-PLAN, Instituti për Zhvillimin e Habitatit në bashkëpunim me VIS Albania dhe COSV – Cooperazione per lo Sviluppo.

Share this Post